Partitë vlerësime për presidentin Pendarovski

Partitë vlerësime për presidentin Pendarovski

Partitë politike kanë dhënë vlerësime të ndryshme pas inaugurimit të Stevo Pendarovskit për president të Maqedonisë së Veriut.

“Më në fund pas 10 viteve fituam presidentin e vërtet i cili u zgjodh në zgjedhje të lira dhe demokratike. Jemi të bindur se Pendarovski do të na çojë para dhe do të jetë udhëheqës i përparimit dhe rrugëtimit drejtë integrimit në NATO dhe BE”, deklaroi deputetja e socialdemokratëve në pushtet, Frosina Remenska.

Opozita maqedonase akuzoi se Lidhja socialdemokrate SDSM dhe Stevo Pendarovski janë futur në borxh politik tek partnerët e koalicionit.

“Pendarovski dhe Zaev do të paguajnë kredi të madhe në llogari të qytetarëve të cilët votuan për të dhe pritën më shumë nga ai. Ata dhanë gjithçka dhe u futën në kredit të madh me qëllimin e vetëm që Pendarovski të bëhet president”, theksoi deputeti i VMRO-DPMNE-së, Antonio Milososki.

Por BDI hodhi poshtë pretendimet e opozitës maqedonase.

“Pendarovski është kandidati ynë dhe ne konsiderojmë se ishim faktori që vendosëm për fitoren e tij. Nuk kemi pse t’i dërgojmë fatura kandidatit tanë i cili i fitoi këto zgjedhje”. – theksoi Artan Grubi, Deputet i BDI-së

Opozita shqiptare pret që presidenti i ri të mos veprojë si ish presidenti Gjorge Ivanov.

“Nëse presidenti i ri ka vullnet dhe gatishmëri që të bashkëpunojë me opozitën shqiptare, sigurisht që edhe neve do të bashkëpunojmë me kapacitete të plota”, thotë deputeti i Lëvizjes BESA, Fadil Zendeli.

Stevo Pendarovski dje pasdite filloi mandatin e presidentit të pestë të Maqedonisë së Veriut. /IBNA