“Lufta” kryesore për institucionet e reja që krijoi reforma në drejtësi

“Lufta” kryesore për institucionet  e reja që krijoi reforma në drejtësi

Ngritja e institucioneve të reja, që u krijuan në kuadrin e reformës në drejtësi duket se përbëjnë edhe sfidën më të madhe të gjithë gjyqtarëve apo prokurorëve, që duan të jenë pjesë e tyre.

Teksa kanë nisur të shfaqen edhe debatet e para, si ai për figurën e prokurorit Bujar Shoshi, tashmë anëtar i Këshillit të Lartë të Prokurorisë, tashmë i kthyer në një debat institucional.

Dhe kjo, pasi opozita e akuzon atë se e ka kaluar vetingun në kundërshtim me ligjin, pasi ka qenë bashkëpunëtor i ish-Sigurimit të Shtetit në kohën e komunizmit. Akuzë kjo, rreth së cilës ka reaguar dje edhe vetë Komisioni i Monitorimit të Reformës në Drejtësi, sipas të cilit rasti në fjalë duhet verifikuar.

Ndërsa vetë prokuroria ka sqaruar se para emërimit të Shoshit, ka marrë mendimin e Autoritetit të Informimit mbi Dokumentet e ish-Sigurimit të Shtetit (AIDSSH), i cili e ka nxjerrë atë si një figurë të pastër.

Ndërkaq, një institucion që pritet të marrë vëmendjen për emërimet e tij është edhe SPAK, e njohur si Prokuroria e Posaçme Antikorrupsion dhe kundër Krimit të Organizuar.

Tashmë për të kanë aplikuar tre prokurorë, Anton Martini, Klodian Braho dhe Besnik Muçi.

Nga ana tjetër, edhe Gjykata Speciale, gjithashtu një organ i ri me objektiv luftimin e korrupsionit, pritet të ketë një garë të madhe brenda saj për emërimet e anëtarëve.

LISTA/ Institucionet e reja

Në kuadrin e vetingut

Komisioni i Pavarur i Kualifikimit

Kolegji i Apelimit, Komisionerët publikë

Operacioni Ndërkombëtar i Monitorimit

Në kuadrin e drejtësisë

Këshilli i Emërimeve në Drejtësi

Këshilli i Lartë i Prokurorisë

Këshilli i Lartë Gjyqësor

Prokuroria e Posaçme

Byroja Kombëtare e Hetimit           

Gjykata Speciale.