Kokainë me vlerë 10 milionë euro tentoi të futet në Shqipëri nga Malta

Kokainë me vlerë 10 milionë euro tentoi të futet në Shqipëri nga Malta

Një sasi kokaine që në tregun e zi narkotik kap vlerën e më shumë se dhjetë milionë euro, ishte transportuar në portin e Maltës për t’u futur në Shqipëri.

Ngarkesa me kokainë u zbulua sot në tre kontenierë të ndryshëm.

Dy prej tyre kishin si destinacion Durrësin dhe i treti, Selanikun.

Gjithsej u zbuluan 91.3 kilogramë kokainë në 76 pako.

Policia malteze tha se operacioni për zbulimin e të gjithë kokainës zgjati 19 orë.

Droga u zbulua nga pajisjet e skanimit që tregonin parregullsi në kontejnerët rreth të cilëve zyrtarët kishin dyshime.

Autoritetet malteze thanë se po punojnë për zbardhjen e plotë të ngjarjes dhe zbulimin e autorëve. Hetuesit në Maltë kanë kërkuar dhe ndihmën e policisë shqiptare.

Ish zëvendësministri i Brendshëm, Gent Strazimiri, komenton zbulimin e drogës së fortë duke u shprehur skeptik se autoritetet shqiptare do të kenë sukses në zbulimin e trafikantëve.

Ai thotë se u zbulua plani për të “sulmuar” Shqipërinë me kokainë të pastër, 91 kg me vlerë 10.3 milionë euro me destinacion Shqipërinë”.

Strazimiri kritikon ministrinë e Brendshme, kur thotë se ajo është e paaftë të zbulojë rrjetin trafikant.