Drejtësia, gara mes atyre që ikin edhe atyre që po futen në sistem

Drejtësia, gara mes atyre që ikin  edhe atyre që po futen në sistem

Sistemit të drejtësisë shqiptare, deri tani i janë larguar  mjaft gjyqtarë dhe prokurorë, të verifikuar kryesisht për fshehje apo deklarim të rremë pasurie.

Pasojë direkte kjo e vetingut, i cili ka nisur prej më shumë se një viti dhe që në total, do të kalojë në “sitë” rreth 800 të tillë.

E ndërsa ky proces vazhdon, ajo që po bie në sy tashmë është “ana tjetër e medaljes”: Gara e prokurorëve dhe gjyqtarëve që synojnë të futen në sistemin e drejtësisë.

Ata kanë nisur ta bëjnë tashmë këtë, përmes paraqitjes së kandidaturave të tyre kryesisht për në organet e reja të sistemit, por edhe për të plotësuar vendet vakante në ato që janë thuajse “boshatisur” prej vetingut të deritanishëm.

Një rast konkret është ai i Gjykatës Kushtetuese, prej ku edhe nisi të aplikohej procesi i vetingut për shtatë anëtarët e tij Bashkim Dedja, Vitore Tusha, Altina Xhoxhaj, Fatmir Hoxha, Gani Dizdari, Besnik Imeraj dhe Fatos Lulo.

Nga këta, vetëm e dyta arriti ta kalonte me sukses atë, ndërsa Imeraj dha dorëheqjen dhe Dedja u shkarkua pas apelimit.

E në një situatë të tillë, teksa organi i lartë gjyqësor gjendet prej muajsh në ngërç për mungesë anëtarësh, pranë tij kanë nisur të paraqiten kandidatët e parë, ku tre prej tyre u bënë dje publikë nga Kuvendi: Avni Shehu, Marsida Xhaferllari dhe Theodhori Sollaku.

Emri më i përfolur? Theodhori Sollaku, i cili ka mbajtur gjatë viteve 2003-2007 postin e Prokurorit të Përgjithshëm dhe së fundmi, është shfaqur në publik edhe si avokati i të njohurit si “Eskobari i Ballkanit”, Klement Balili.

Por edhe emri i Avni Shehut nuk është më pak i njohur, ndërsa ai ka qenë ish-kryetar i Gjykatës së Lartë në vitet ’90.

Ndërsa kandidatja e tretë për në Kushtetuese, Marsida Xhaferllari, njihet si shefe e Inspektimit në Këshillin e Lartë të Drejtësisë.

Në këtë këndvështrim, i bie që në organin e larttë gjyqësor që shqyrton kushtetueshmërinë e ligjeve në vend të futen juristë me përvojë nga profile të ndryshëm të sistemit të drejtësisë.

Situatë e ngjashme që pritet të ndodhë edhe me plotësimin e vendeve vakante në Gjykatën e Lartë, edhe ajo e mbetur në ngërç nga pasojat e vetingut.

EMRAT

Kandidatë për në Gjykatën Kushtetuese

Avni Shehu

Marsida Xhaferllari

Theodhori Sollaku